الاثنين، 20 يونيو، 2011

هو أحنا كنا بنعمل ثورة ليه؟



طريقة عمل الميزانية الحديثة العصرية !! 

الميزانية و المقادير بقى يا أم ميمي هي :

66899376 باكو معسل
 538772 مطوة 
 85 مليون ميكروفون
988361 مايوه بيكيني 
73986 مشبك غسيل
  368781 ولاعة 
 70769 كيس طرشي 
  4989 لاب توب
38972 كرسي بحر 
 86 ملعب كورة 
38797 كيس مخدة 
881 جاكت رجالي
279 حزام بنطلون 
 71816302 جوزة 
3 مراكب صيد 
 9174583 شراب حريمي 
 398765 أستك

و تضربي المقادير في الخلاط اللي طلع عينه ضرب و بيستغيث  و تحطي الصينية في الفرن درجة حرارة 350 مئوية مدة نص ساعة و تطلعي الصينيية على الفريزر عدل بعد لما تتحرق مدة 23 ساعة.

وبعدين تأخدي الصينية على مجلس الشعب "موافقة إجماع" على طول و تقعدي تصوتي و تلطمي و تطالبي بمظاهرة مليونية.

و تكون مطالبك صينية كوسة بالباشاميل قبل ما جوزك يرجع من الشغل عشان عايز يتغدى قبل ما تأخدي صابونة وعلى حسب ظني فيه حد حيأخد صابونة .

ما تنسيش تسخني المخلل و تضيعي وقت يا أم ميمي .. فين الحلو ؟ الحلو بقى  جاي يا طفس .. هات واحد مظاهرة كمالة يا ابني .

تيجي نلعب السبع طوبات !!

مش عايزك تتحايل على حد و تقعد تقول له أبوس إيدك و أبوس رأسك لكن ممكن تبوس الواوا و عمنا محمد عبد الوهاب قديما قال بلاش تبوسني في عينيا لكن النهاردة هيفاء وهبي سمحت لك تبوس الواوا و أخواتها ده لو عرفت !! 

ولأن شر البلية مايضحك فمش عارف ليه  إفتكرت نكتة الصعيدي اللي بيسألوه : إيه أهم خمس حاجات في الدنيا ؟ فرد و قال : أهم خمس حاجات في الدنيا ثلاثة المية و الهوا !!

لو سمحت ما تضحكش هي مش ناقصة طبة ميزان و ده إقتصاديا صحيح و ذلك بإنتهاج سياسة التقشف للشعب و إبتهاج سياسة البذخ للحكومة .

بس أنا متفائل عارفين ليه لأن اللي حافظ مصر هو ربنا عز و جل لكن إحنا لأ !! بجد ده اللي بنعمله في البلد كشعب و اللي بيعمله العالم كله في مصر و فينا كان جاب أتخن شعب الأرض لمس أكتاف لكن ربك هو الحافظ .

وربنا لو اللي إتعمل في مصر كان إتعمل في شعب تاني كان جاب مارشدير و جاب زيت و إبقى جيب سكر عشان خلص .

لو عايز شعب يتقدم يبقى توضع له هدف و توجه الشعب عليه زي السهم لكن تسيب الشعب فاضي !! يبقى إستلم بقى يا معلم .

مظاهرات و حيعمل لك عجين الفلاحة و نوم العازب و جواز عرفي و صويت و قعدة على النواصي و شعبطة على السطوح و نط من ع السور و لا أراكم الله مكروها في عزيز لديكم .

الإقتصاد الصح هو الدولة .. فتش عن الإقتصاد .. فتش عن الإقتصاد و بلاش تلعب برؤوس الجميع . عايزين ميزانية ما تخرش المية و ركب لها جلدة . ميزانية ترفع روحي المعنوية و تنزل ضغطي في بير السلم .

تيجي نلعب "صلح" تحت الكوبري و نسيب ميدان التحرير فاضي الجمعة الجاية !!

فين الشاي يا ابني هو الشاي صايع هو كمان !!






هناك تعليقان (2):

Ms Venus يقول...

بجد حاجة توجع القلب يا تامر

بس انت قولتها صح اوى

ربنا هو اللى حافظ مصر

Days and Nights يقول...

الأخت الغاليه والعزيزة / فينوس

بجد أنا متعجب من الأحوال بعد 6 شهور من الثورة ... ربنا يعمل اللى فيه الخير ... وكل الشكر لشخصكم الكريم على المتابعة والتعليق

تحياتى

تامر