فى ناس بتسأل ياترى احنا بنكتب ليه؟
"هل عشان نشيل ذكرياتنا و حواديتنا عشان تفضلنا زاد فى السكه و مننساش ابداً؟
و لا ساعات تانيه العكس عشان لما نخرجهم فى حروف حنخرجهم من جوانا و متفضلش صورتهم متعلقه قدامنا
لأن أحسن صوره مبتتنسيش جواك هي الصوره اللى مصورتهاش فعلا؟"
ياترى عشان نفسنا ننقل لغيرنا الصور ونفسنا غيرنا يعرف و يفهم و نلاقى سوا اجابات لعلامات الاستفهام؟
حواديت من وسط كتير هزونى و مقدرتش اشيلهم من جوايا
اتخرج من كليته ووسط رحله البحث عن وظيفه مبقاش فاضل غير العروسه
و بما انه لم يكن له اى علاقات بالجنس الآخر كان لازم يكون جواز تقليدى
و كانت لازم تبقى احد القرايب
(س) كانت قريبه من طرف الأم
و وسط الزيارات المتباعده
اتقدم فلان الى (س) و قوبل بالقبول
و رغم المشاكل الكتيره والاختلافات الجوهرية بين الشخصيتين
تم الجواز بمساعده الأهل
و بدأت سلسله تنتهى للحظه كتابه السطور
و ان كانت أخدت مسارات مختلفه
فلان اكبر اخواته اتربى تربيه محترمه و مغلقه و بمسئوليه
ولكن نظرا لحب اهله الشديد و بخاصه حنان الأم
كبر فلان ف البيت متعود يتعمله كل حاجه ، متعود على اللى ياخد باله منه و يكلمه و يحايله
نقدر نقول ان فلان انسان كبر على الطيبه و الحب مع حته دلع و خام متعكش فى مشاكل الدنيا
(س) ملهاش ف اى حاجه
طيبه محترمه بتسمع الكلام و مستسلمه جدا
مبتعرفش تتكلم و تعبر عن اللى جواها
مامتها شخصيه قويه و باباها انسان مستسلم
محدش يعرف العلاقه فى البيت بين (س) و فلان تفاصيلها عامله ازاى
بس معرفش ليه لما الظروف وضعتهم أمامى و قربتنى من مشاكلهم
حسيت انهم ممكن يكون بينهم مشكله النعامه و الطاووس فى تعاملاتهم حتى العاده
مع حاجز من العيب والكسوف و عدم المبادره المتبادل
فلان متعودش على الاهمال عايز حد يكلمه و يدلعه و يحس بيه و يبادر و يكسر الحواجز
(س) اتعودت على انها تبقى خفيه تطلب منها طلباتك مجابه بس متعرفش تتكلم و تنفعل و تعبر
(س) اتربت على العيب و الاحساس بالذنب و متعرفش يعنى ايه روح واحده
(س) عمرها معرفت تشوف حتى نفسها و تعبر عنها وعن مشاعرها
و ان الحب مش علاقه قد ما هو انصهار كلى
(س) اتعودت تحكى كل حاجه لمامتها
و فلان اتعود يشتكى لأمه
و من هنا بدأت اكبر المشاكل
8 سنين جواز و طفله عندها 6 سنين وطفل عندة 4 سنين محلتش مشاكل (س) و فلان
و بعد كم من الخلافات و المشاكل و الاقامه لفترات فى بيت الاهل
و مجالس الصلح
دخل شخص تالت
زميله فلان
اللى احترمت فلان و حست انه شايل هموم
و حاولت تخفف عنه
و كانت النتيجه جواز تانى!
لحد دلوقتى مش قادر افهم او انحاز لطرف بس بحاول احط نفسى مكان كل طرف
يمكن افهم ازاى العلاقات الثلاثيه بتتكون
الزوج اللى مقدرش يتمسك بجوازه و ان كان ملجأش للطلاق و لجأ لجواز تانى
بحثا عن السعاده فى بيت تانى مع واحده تانيه قدرت توفرله
الحنيه و الرعايه المعنويه الكامله و الدلع !
و اختيار تانى مختلف تمام الاختلاف عن الزوجه التانيه
بشكل انسانه تعرف ازاى تحتوى راجل و تديله و تحاوطه تماما معنويا
و نفسيا من طرف تانى لانها أحكمت عليه تماما
الزوجه اللى وقفت عاجزه و مستسلمه مابين جوازها و اهلها
و مقدرش تدافع عن بيتها و جوازها و اولادها
و جوزها اللى بتحبه قبل كل حاجه رغم انها مش عارفه تنقله الحب ده
و تعبر عنه زى ما هو عايز
و تاهت وسط الخوف على الشقه و مين صح و مين غلط زى ما أمها قالتلها
و مفاقتش غير متاخر جدا مع طفلين
و اب معندوش بنات تتطلق
و زوج كاره محب لاخرى و ان كان مش حيطلق عشان عايز الجواز التانى زائد ولاده!!
الزميله اللى على قدر من الجمال و فى سن مش كبير و تملك ميراث
يغنيها عن انها تترمى قدام اى حد و خاصه متجوز و عنده طفلين!
و رغم كده اختارته و ان كانت قبلته هو و عايزاه هو و ليها هيه
ملهاش دعوه بالزوجه التانيه و اطفالها!!
و مش عايزاهم و مخلتوش يروح حتى يشوف أبنه اللى لسه جاى الدنيا
ايوه بقى فيه طفل ثالث أبوه مشافوش!
اتولد لوحده فى الوقت اللى أبوه وصل لمرحله الرفض المطلق لمراته و اهلها
و بقت كل علاقته بيهم يسجل الطفل و يبعت مصاريف
لحظه اقول لنفسى ليه الزوج دايما أنانى عايز كل حاجه و مش عايز يخسر
ليه استسهل اوى كده و متعلمش يحافظ على جوازه و يواجه مشاكله و يحلها
ليه مخافش على بنته و ليه مشفش الطفل اللى مكانش عاوزه مش برده ابنه
ليه مش قادر يشوف عيوب مراته الجديده
ليه مفتكرش لمراته لحظه حنيه واحده
و كمل قعدته مع خطيبته الجديده و تجهيزات جوازه وسط القعده
فى الوقت اللى مراته كانت فيه بين الحياه و الموت عشان تجيب طفل منه
ليه مش قادر يتبع معامله بمعروف او تسريح بإحسان
ليه مش عايز يطلق و مش قادر يعدل
ليه راح اتجوز بالشكل ده من قريبه معرفهاش كويس و جايز محبهاش
ليه استعجل
ليه كمل و ليه جاب طفلين و هو شايف المشاكل
ازاى سمح لنفسه يكون على علاقه بغير مراته
ازاى قدر ف الوقت اللى بقى فيه بيحب تانيه يقيم علاقه مع مراته
و ازاى سمح يفتح قلبه و بيته و مشاكله لزميلته .
و ازاى و هو بيقول دى بتقول كل حاجه لأهلها و بالغلط و بتسمع كلامهم
يروح يتكلم مع واحده غريبه فى خصوصيات حياتهم
و أوقات أقول ياترى مش من حقه يدور على حب وحد تانى ليه رد فعل يكلمه و يشاركه و يحبه بعد ما فشل
خصوصا انه انسان طيب جدا و محترم
بس كان المفروض يختار كويس و ياخد وقته و يفكر كويس فى الجواز التانى
ان كان ده اختياره و هو المسؤل عنه و دى حياته مش حقه يعيشها مع الانسانه اللى اختارها
مش ممكن يكون حاول و فشل و مقدرش يلحق جوازه
ممكن حقه يزعل إن مراته جابت طفل منه وهما بيستخدموا وسيله و متفقين ميجبوش اطفال تانى دلوقتى
وسط مشاكلهم المتزايده
و قد ايه صعب اوى قرار انك تتجوز لتانى مره و تتحمل مسؤليه بيتين و اسرتين
مش قادره مامنعش تعاطفى مع الزوجه
الطيبه جدا و الخام جدا جدا و عارفه قد إيه مؤلم للشخص انه ميعرفش يعبر عن أحاسيسه
و يكسر حاجز الخوف و الخجل و التقاليد
صعبانه عليا وجعها لحظه ما دخلت تانيه حياتهم
رغم انى اتغظت من استسلامها الزايد و عدم قدرتها على التعبير و الرد
لدرجه انها فى فرش بيتها مكنش ليها رأى و قالت زى ما تحبوا !!
ازاى بيتى غيرى يرتبه و يختاره مكان كل حاجه فيه و انا ساكته؟!
ليه اوافق على جواز من غير حب؟!
ليه لو محستش بتوافق أسكت ولا اتكلم؟!
ليه اكمل و اجيب أطفال؟!
و تركها لزوجها و بيتتها بمنتهى السهوله و الانقياد التام للأهل
و الاسؤ كونها مصدر دايم لنقل كل اللى بيحصل فى بيتهم
بس كل لحظه بتعدى عليا بلاقينى بحطنى مكانها و استخلص مشاعرها
تصعب عليا أوى
قد ايه مؤلم ان جوزى يكون فى بيتنا بيكلم واحده تانيه و بيحبها
بيشتغل معاها و بيتأخر معاها و ياخد باله من نفسه عشانها و انا عارفه
و يقيم علاقه معايا و هى بينا و انا ساكته
ياترى جابت الطفل الثلث حبا فيه ولاً خوف يضيع منها و محاوله لاسترجاعه
و لا أستجابه لرغبه الأهل و النصيحه الشهيره " أربطيه بعيل!"
ياترى كان نفسها فى حته منه
أعتقد أنه من الصعب على الست معنويا و نفسيا تقيم علاقه و تجيب طفل و مفيش حب و مشاعر
و مؤلم أكتر تقيمها و انا عارفه ان جوزى و حبيبى معايا
عشان بيفرغ حاجه جسمه لأنه بيحب تانيه و بيحلم بيها
قد ايه كان مؤلم ليها انها تجيب الطفل لوحدها و محدش يسأل عليه
قد إيه مثير للغضب ان بنتها الصغيره تشوف بابا مع واحده تانيه كذا مره عند جدتها
و تاخدها تجيبلها حلويات و تلعب معاها عشان تكسبها
و تحس انها بتخسر كل حاجه الطفله و الزوج و الحبيب
قد ايه كان صعب عليها خبر جوازه من التانيه
مش بس كده سكنه الجديد اللى على بعد أمتار من شقتها!
و قد ايه اتحملت كل ده و اتكسرت و اضطرت بعد شهور سابها فيها عند اهلها من غير ما يروح ياخدها
ترجع بنفسها و تعدى على بيتهم و ترجع بيتها الفاضى مع عيالها
و يقابلها الزوج لما يعرف برفض تام لرجوعها حتى و هو مش فيه قبل اعتذار اهلها
اى مراره تكفى كل ده وأى جسم يستحمل الوجع ده كله
ياترى الأخت دى بتفكر ازاى بالظبط
ياترى بجد حبيته و مقدرتش تقاوم مشاعرها
ازاى سهل على واحده تظلم تانيه و تحاولش تحط نفسها مكانها
ازاى سهل على واحده انها تدخل حياه واحد و هى عارفه انه مش بس متجوز لأ ده أب
ياترى كونها يتيمه حسسها بالغربه وسط أخواتها اللى شغلتهم حياتهم
ياترى تعبت من اللف بين بيت اهلها اللى فضى عليها و بيوتهم
ايه اللى يخلى واحده كويسه ماديا بميراث أهلها و شغلها
مش كبيره و مش وحشه تلجأ الى رقم 2 فى حياه واحد
ان مكنش رقم 3 بعد اطفاله
و هى عارفه كويس ان اللى بيحب مبيستحملش القسمه اللى من النوع ده
قدرت ازاى تاخد قرار تبقى فيه مرات أب
مرات الأب اللى خدت بابا الطفله و الطفل منهم
الطفله اللى انفجرت فى العياط المتواصل لما بابا سابها و راح مع طنط يوصلها
فما بالك لما تكبر و تعرف ان خلاص بابا اتجوز طنط دى و مش راجع عند ماما
و ان حياتها من اللحظه دى حتاخد طريق تانى
و ما بالك لو حكمت الظروف تشوف بابا فى بيته الجديد
القلق بياكلنى عليها
ياترى فيه اى حل نجنب الاطفال دول الألم
ليه دايما محدش بيفكر فيهم و بكم التمزق و الألم اللى بيحسوه
و قد ايه بسرعه بيكبروا و بيودعوا طفولتهم بدرى سواء فى انفصال او فى حياه واحده مليانه مشاكل
ياترى لما تكبر و تحب كام واحد حيفكر كويس اوى قبل ما يتقدم لواحده
باباها متجوز على مامتها و سايبها و نتاج البيت ده
ايه ذنب الطفل ده اللى جه للدنيا غير مرغوب فيه و حيكبر محروم من الحنيه
و مشاعر الكره و من غير أب مع أم من أول لحظه
ضحايا العلاقات الثلاثيه الأطفال دول و محدش حيقدر يخبيها عنهم
و يحميهم و يجنبهم الألم
ازاى ليلى تجى على ليلى تانيه و ليلى طفله؟؟
مش قادر اعرف!
ليست هناك تعليقات:
إرسال تعليق