الخميس، 23 سبتمبر 2010

معتقدات شائعة





- لو الواحد مقدرش يمسك دموعه بيجرى على الحمَام عشان ما يبكيش قدام الناس، تلاقى ناس بتصرخ فيك، إوعى تعيَط فى الحمام..ليه يا جماعة؟
غلط غلط، طب أخرج عيط برة، بس بلاش الحمَام خالص.

- لو حسيت بآكلان فى إيدك اليمين، يبقى فى ضيف جايلك فى السكة و هاتسَلم عليه لوحسيت بآكلان فى إيدك الشمال، يبقى فى فلوس جايالك فى السكة و هتقبض.

- لو عصفورة معدَية فوقك و وقَعت عليك حاجة، يبقى هتتكسى قُريب.

- لمَا تجيب عربية جديدة، علَق فيها فردة جزمة من قدام أو من ورا، عشان لمَا يجى حد يحسدك عينه تيجى فى فردة الجزمة فيستغرب فميحسدكش.

- لو سِنَة من سنانِك وقعت، إرميها للشمس.

- لمَا تكون ضيف عند ناس، لازم تشرب كوباية العصير كلها، لو سبت حاجة فيها، البنات اللى فى البيت دة مش هتتجوز.

- لو حمامة باضت جنب شباك البيت، يبقى فيه خير جاى.

- أخطر حاجة هى موضوع قلب الشبشب، لازم تعدله علطول أول ما يتقلب .

- لو بصيت فى عيون قطة سودة، يبقى فيه حاجة وحشة هتحصلك.

- ما تبصش فى المراية و الدنيا ضلمة.

- لو كحيت فجأة أو شرقت، يبقى فيه حد بيجيب فى سيرتك.

- ما تلعبش بالمقص فتح و قفل من غير لازمة، علشان بيجيب نكد للبيت
(على رأى صديق: على كدة الحلاق عمره ما شاف يوم حلو)

- ما تحُطيش إيشارب ورا رقبتك و تحركيه يمين و شمال، يا متحركهوش كدة يا تشيليه خالص.

- لمًا تقصى شعرك، إوعى ترميه.

- لو غسيل جارتك اللى فوقك نقًط على غسيلك، يبقى هيجيلك خير.
(هبقى أوصى جيرانَا يدلقوا ميَة علينا كل يوم)

 - "اللهم اجعله خير" بعد الضحك ، لايمان بأن الفرح الكثير لا بد أن يكون ملحوقا بحزن و مصيبة.

- "غير السيرة دي" سيرة العفاريت و الجن و الأشباح.اعتبار أن الحديث عن هذه الأشياء يتسبب في حضورها؟


-  لو عينك بترف يبقى في حاجة هتحصل.

-  محدش يكنس بليل.

- لو جزمتين محطوطين فوق بعض يبقي حد مسافر.

- لو ايد حد منملة يبقي جاي له فلوس.

- الغراب فأل وحش.

- متخاليش حد ياخد الخاتم من صباعك لأنه كده حياخد حظك سواءً كان حظ سيئ أو سعيد!

- الواحد لما يقسم برتقانة مع حد يفضلوا طول عمرهم بيحبوا بعض.

- الواحد لما يتثاءب لازم يحط إيده على بقه وإلا الشيطان يدخل في بقه!

- لازم الست وهي بتحط الملوخية على التقلية تشهق بصوت عالي وإلا الملوخية تطلع وحشة!

- لو دخلت على ناس و الأكل محطوط على السفرة يبقى " حماتك بتحبك"

- البنات بيرحوا يقرصوا العروسة عشان " أقرصك في ركبتك ، أحصلك في جمعتك"

- لما حد يكون عنده سخونيه يقولوا له ما تنمش حافي.

- ماينفعش حد يقص قماش عشان يفصله يوم الثلاثاء.

- محدش يقص أظافره بليل.

- ممنوع الرجل يدخل على ست والدة ولابس الجلابية بالمقلوب.

- الجلوس على القرمة (المكان اللى بيندق علية الحديد عند الحداد)  بيقطع الرزق.

- ماتتكلمش على الشغلانة الا لما تبدأ تشتغلها فعلا ، لأن الكلام قبل كده فال وحش.

- لو واحدة لسة والدة فالمفروض محدش يدخل عليها و هو لسة حالق شعره.. لحسن "يشهرها" بمعنى إنه ينشف لبنها.

- لو دخلت الحمام حافي ممكن تدوس على رجل عفريت.

- الصفير بالليل وحش [يجيب العفاريت؟].

- ممنوع واحدة لابسة دهب تدخل على ست والدة عشان ما تحصلش مشاهرة.

- لو حد عدى فوق عيل صغير ما يطولش.

- لو حد شاف حلم حلو ما يحكيهوش لحد عشان لو حكاه مش هيتحقق.

- لو رضيع ضحك من غير سبب واضح يبقى شايف ملايكة.

 - البوسة فى العين تفرّق.

- إذا عطس أحد الحاضرين أو رُفع الآذان وأنت تتكلم فأنت صادق.

- تعمل عروسة ورق و تقعد تخرمها بدبوس وانت بترقى شخص من كل اللى ممكن يحسدوه او يكونوا حسدوه و بعدين تحرقها.

- لما تقلب"يعنى تقوم بتقليب" كوباية الشاى و يبقى فيه فقاقيع بعد ما تخلص  يبقى ها يجيلك فلوس.

- لما تكون بتاكل و الاكل يقع منك يبقى فيه حد قريب منك جعان.

- فى الفرح كل البنات اللى مش مجوزين يقفوا ورا العروسه و هى تديهم ضهرها و ترمى بوكيه الورد اللى فى ايدها و اللى تلقفه فيهم يبقى هاتتجوز.

- فتح الشمسية جواالبيت بيجيب نكد!


- و طبعاً ما ننساش إن دلق القهوة خيـر.





ليست هناك تعليقات: