الخميس، 16 سبتمبر، 2010

الوصايا الثماني الذهبية




يبدو أن أحد الشباب الذين أقدموا على الخطوبة مؤخرا وجد فى العبد لله ضالته المنشودة ، حيث رأى إننى حالة نادرة فى الحياة الزوجية نظرا لمرور أيام قليلة على الإحتفال باليوبيل الخشبي لزاوجى عشر سنوات يعنى ، طلب منى أن أسدى له بعض النصائح التي أراها الهامة لنجاح حياته الزوجيه
وضعت يدي على كتفه وقلت له شوف يابنى .. أنا هاديلك عصارة تجربتى فى الحياة الزوجية وإعمل إللى هاقولك عليه فى فترة الخطوبة والزواج .. جوازك يستمر وتعيش متهني وملك طول عمرك

أولا : لو ليك تجارب عاطفية قبل كده ، إوعى تحكى لخطيبتك عليها عشان تبين لها إنك واد حبيب والبنات بتموت فيك .. كل ده هايطلع على دماغك بعد الجواز وهايتعمل عليك حظر دولى من كل من ينتمى للجنس الناعم

ثانيا : لو إنت معجب بمغنية أو عارضة أزياء أو ممثلة أو رقاصة .. إحتفظ بالسر ده لنفسك عشان لو هي عرفت مثلا إنك أحد المتيمين بجمال نانسي عجرم ، هاتسببلها عقدة نفسية لأنها عمرها ماهاتكون شبهها وهاتحاول تعمل المستحيل عشان تبقى زيها عشان ترضى سعادتك وده معناه إن كل يوم هاتلاقيها طالعاك بشكل أغرب من اليوم اللى قابله وتسألك سؤال تقليدى بذمتك أنا أحلى ولاهى ؟ لغاية ماإنت تزهق وهى تزهق وتقوم شاتماك وتقولك بلا نيلة يعنى إنت اللى شبه هانى سلامة يعنى ؟وطبعا سيادتك زى مانت عارف فيك شبه كبير من سامى العدل ، وإحذر هيفاء وهبى لأنك فى الحالة دى هتلاقى مراتك كل يوم وهى راجعه من الشغل وراها عشرين واحد ماشي وراها وممكن اكون واحد منهم

ثالثا : مافيش داعى تحكى عن مواقفك الطريفة اللى حصلتلك قبل كده عشان ده مابيكونش طريف بالنسبة لها ولكن بيديها إنطباع إنك واحد أهبل وهايف وعبيط ، زى ماتحكيلها مثلا عن يوم ماكنت قاعد فى أحد الصالونات مع ناس محترمة وتكتشف وانت بتحط رجل على رجل أنك لابس شراب واحد ، أو مثلا لما ركبت التاكسي وإكتشفت إن ماكانش معاك فلوس والسواق هزأك ، او لما البوليس قفشك باليل وماكانش معاك بطاقة ونمت فى التخشيبة للصبح .. مافيش داعي يعنى هى مش هاتنسي الحاجات دى وهاتطلع وقت اللزوم

رابعا : إياك وأي تذكار زى منديل أو شريط كاسيت من صاحبتك السابقة إذا كان فيه ، لأنها إذا إكتشفت مثلا دبدوب أبو نص جنيه محتفظ فيه بدولابك فده معناه إنك هتلاقيه متقطع ومرمي فى الزبالة وهايكون ده مدخل لحاجات كتير تختفى من دولابك قد تصل إلى النقود ، حيث انها تدخل فى باب الهدايا التذكارية

خامسا : مافيش داعى إنها تعرف تفاصيل دخلك الشهرى حيث أن لديها إعتقاد خاص بأن أي جنيه زيادة فى دخلك الشهرى سوف يدفعك إلى الرذيلة ودرءا للمفاسد هاتحاول تجردك منه بكل الطرق المشروعة والغير مشروعة

سادسا : مافيش مانع أن تجاريها فى بعض هوايتها كالحديث بصوت مرتفع فى بعض الليالى القمرية أو إلتقاط بعض الفضلات الملتصق بسجادة غرفة المعيشة وإلتهامها أثناء مشاهدة التليفزيون ، أو السير بالمنزل طوال اليوم بشبشب فردة واحدة بس

سابعا : لاتحاول إخفاء أى معلومة عنها حتى ولو كانت تافهة فهى هاتعرف هاتعرف ولو لقيتها بتلعب فى الموبايل بتعاك سيبها لأن أى حركة منك هاتؤكد لها إنك عامل بلاوى مسيحة وعمال تترازل على بنات الناس لإحساسها الأبدى إنك إنسان ماعندكش دم

ثامنا : تجنب دائما الحديث مع الجنس الناعم أمامها ، يعنى مثلا لو إتصلت بيك البنت بتاعة الإيه أر تي أو الأوربت عشان الإشتراك قولها ، خدى المدام كلميها وممكن إنت تبقى تكلمها بعدين لو عايز تعرف معلومات أكتر عن المحطات التانية ، ولوجارتك خبطت الباب وفتحتلها الباب بص فى الأرض وإطلع إجرى إدخل جوه وناديلها وإختفى تماما حتى تنصرف الجارة وإكتفى بما تراه من جارتك عندما تقابلها على السلم منفردا

رفع الشاب يدى من على كتفه وقال لى والله أنا سعيد جدا بمعرفتك .. وياريت ماشوفش وشك تانى

ليست هناك تعليقات: