الأحد، 19 سبتمبر 2010

فرط الرمان



تفتكروا طعم السما ايه؟ يعنى لو اخدت حته من السما و عملتها كوره ممكن تبقى ازاى من جوه؟
 
اكيد ناعمه، و اكيد حلوه، و اكيد و انت بتقطم منها مش هتسيب تعاريج.صح ..بالظبط ذى خوخه مدوره و ناعمه و حلوه و من غير تعاريج.

ممكن تكون ما دقتش السما ،لكن دقت الرمان؟ طب عمرك دقت حاجه خليتك تتمنى ان كل الناس تدوقها؟ حاجه تسيب بين شفايفك طعم يخلى مهما الجوع يقرصك ما ترضاش تلخبط طعمها بطعم اى حاجه تانيه؟

يا جماعه هى دى رمانه او بمعنى اصح فرط الرمان .

كنت دايما لما بشوف فرط الرمان باحس انه خساره فى الاكل. اصله بجد اجمل من انه يتاكل و خلاص و كنت باحس انه اقرب للجواهر منه للفاكهه.الله مثلا على عقد فرط الرمان!! لكن لما كنت باحاول اعمل منه عقد كان بيبقى اضعف من انه يستحمل ثوانى و يرجع تانى فرط رمان.

فى الشتا قدام البحر و انت بتتنفس الهوا البارد ،لابس 50 حاجه فوق بعض و مفيش غير وشك و كفوفك بس هما اللى بيستقبلوا الهوا. تحس فجأه ان كل احساس فيك ممكن تعبر عنه نسمة هوا بارد تلمس وشك او كفوفك.
اهو انا بقه كل ما ادوق الرمان احس بكده! احس ان حبات فرط الرمان يقدروا يعبروا عن كل احساس فيا .

احس بالحريه من تدافعهم وقت الخروج من الثمره ،و بالجمال من روعة درجات الوان الحبه القرمزى الشفاف ،و بالرقه من دوبان الحبات فى حضن شفايفى ،و بالشقاوه من ضحكات رذاذ عصيرهم جوايا و برغم ده كله لو شفتهم و هما جوا الثمره تحس انهم بيندهولك بروح شاربه من الشقا و كأن الشجره متشاله على كتافهم مش هما اللى متشعلقين فيها.

فرط الرمان بقى من غير ما تعرف اسمها تحتار تقول عليها ايه: ريشه حمامه وقعت من جناح مكسور و دواها الهوا ،ولا كام نقطة ملونه وقعوا من ريشة طفل صغير فوق باليته و لما اتجمعوا عملوا لوحه جميله و محندقه.

يمكن كمان تقول عليها اوضه و ليها الف باب منهم بابين متغطيين بقماشه سوده و مسنكرين باقفال نحاس و ان شفتهم يمكن تخاف او تفتكرانهم بينادوك علشان تشيل لون الزمان ولو قربت منهم هتلاقى نفخه واحده منك تبين جنه اجمل شجره فيها شجرة الرمان.

ممكن كمان توصفها بانها ممكن تلخص الحياه كل الحياه فى اٌهه دايبه و دمعتين و ساعات تقولها بشعره طايره و ضحكه بتخلى الهوا حتى الهوا يدوب حنين.

عارف ازاى ممكن تكون مبهور لو انك بتشوف لأول مره ثمرة رمان و لقيت قشرتها بتتفتح و كل حبه بتخلع شالها و تنزل عشان تستقبلك.

تخيل بقه لو قلبك هو اللى كان تحت القشره و خلع شاله و حب يستقبل الحياه.اهى دى بالظبط فرط الرمان. قلبى و كل اللى فى الطبق خالعين شيلانهم و بكل ذره فى كيانهم بيستقبلوا الحياه.بالرغم من انهم شايفين سكاكين الحياه و ياما داقوا طعمها و يمكن كمان من مرها افتكروا طعم الحلو راح الا انهم لسه بيعاندوا الحياه.
وكأنهم مقررين يا يدوبوا يا تدوب الحياه.

ناقص حاجه...
فرط الرمان بقه اصعب ما فيها انها سهل اوى تجرى من بين صوابعى و تهرب و تستخبى هاعمل ايه؟ ما هى لازم تفضل فرط الرمان...

هناك تعليقان (2):

غير معرف يقول...

حلو جدا الموضوع

Days and Nights يقول...

الأخ - الأخت العزيزة

ألف شكر على الموضوع وسعدت بزيارتك ودمت بكل الود